باب: جھاڑ پھونک اور تعویذوں کا بیان

صحیحین میں ابوبشیر انصاری رضی اللہ عنہ سے روایت ہے کہ وہ ایک سفر میں نبی صلی اللہ علیہ وسلم کے ساتھ تھے۔ چنانچہ آپ صلی اللہ علیہ وسلم نے ایک قاصد کو یہ اعلان کرنے کے لیے بھیجا کہ ﴿کسی اونٹ کی گردن میں تانت کا پٹہ یا کسی بھی قسم کا پٹہ نظر آئے تو اسے کاٹ دیا جائے﴾۔ اسی طرح ایک اور حدیث میں ابن مسعود رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا ہے: "جھاڑ پھونک، تعویذ گنڈے اور میاں بیوی کے بیچ محبت پیدا کرنے کے لئے جادو کرنا سب شرک ہیں۔" اسے امام احمد اور ابوداؤد نے روایت کیا ہے۔

تمائم: ﴿تمیمہ کی جمع﴾ اس سے مراد ہر وہ چیز ہے، جو نظرِ بد سے بچاؤ کے لیے بچوں کے جسم پر لٹکائی یا باندھی جائے۔ تعویذ اگر قرآنی آیات پر مشتمل ہو، تو بعض سلف نے اسے جائز قرار دیا ہے اور بعض نے اس کی بھی اجازت نہ دیتے ہوئے اسے ممنوع قرار دیا ہے، جن میں سے ابن مسعود رضی اللہ عنہ بھی شامل ہیں۔

رُقَی: ﴿رقیہ کی جمع﴾ انہیں 'عزائم' بھی کہا جاتا ہے۔ ﴿اس سے مراد دم کرنا ہے﴾۔ واضح رہے کہ اس دم کی اجازت ہے اور اس کے جواز کی دلیل موجود ہے، جو شرک سے خالی ہو۔ کیونکہ رسول اللہ صلی اللہ علیہ وسلم نے نظرِ بد اور کسی زہریلے کیڑے کے کاٹے پر دم لینے کی اجازت دی ہے۔

تِوَلَہ: جادو کی ایک قسم ہے، جس کے بارے میں لوگوں کا خیال ہے کہ یہ بیوی کو شوہر کا اور شوہر کو بیوی کا محبوب بنا دیتی ہے۔

عبداللہ بن عکیم رضی اللہ عنہ سے مرفوعًا روایت ہے: "جس شخص نے کوئی چیز لٹکائی، وہ اسی چیز کے سپرد کر دیا جاتا ہے۔" اسے احمد اور ترمذی نے روایت کیا ہے۔ اور امام احمد نے رُوَیفع سے روایت کیا ہے کہ مجھ سے اللہ کے رسول صلی اللہ علیہ وسلم نے فرمایا: "اے رُوَیفع! شاید تمھاری زندگی دراز ہو۔ لہذا تم لوگوں کو بتا دینا کہ جس آدمی نے اپنی ڈاڑھی میں گرہ لگائی، تانت کا ہار پہنا یا جانور کی نجاست یا ہڈی سے استنجا کیا، تو محمد صلی اللہ علیہ وسلم اس سے بری ہیں۔"

ساتھ ہی سعید بن جبیر کے بارے میں آتا ہے کہ انہوں نے فرمایا: ﴿جس نے کسی انسان کا ایک تعویذ کاٹ دیا، اسے ایک غلام آزاد کرنے کے برابر ثواب ملے گا۔﴾ اسے وکیع نے روایت کیا ہے۔

اور وکیع نے ہی ابراہیم نخعی سے روایت کیا ہے کہ وہ کہتے ہیں: ﴿لوگ قرآن یا غیر قرآن سے ہر قسم کے تعویذ کو حرام قرار دیتے تھے﴾۔