باب: فرمانِ باری تعالیٰ: ﴿کیا وہ ایسوں کو شریک ٹھہراتے ہیں، جو کسی چیز کو پیدا نہ کر سکیں اور وہ خود ہی پیدا کیے گئے ہوں، اور وہ ان کو کسی قسم کی مدد نہیں دے سکتے اور وہ خود بھی مدد نہیں کر سکتے؟﴾ [سورہ الاعراف: 191، 192]۔

پہلا مسئلہ: اس سے سابقہ دونوں آیتوں ﴿جن میں مخلوق کو پکارنے سے منع کیا گیا ہے﴾ کی تفسیر ہوتی ہے۔

دوسرا مسئلہ: اس میں جنگ اُحد کا تذکرہ ہے۔

تیسرا مسئلہ: سیدالمرسلین صلی اللہ علیہ وسلم کا نماز میں قنوتِ نازلہ پڑھنا اور آپ صلی اللہ علیہ وسلم کے پیچھے صحابہ کا آمین کہنا بھی اس سے ثابت ہوتا ہے۔

چوتھا مسئلہ: جن کے حق میں بد دعا کی گئی ہے، وہ کافر تھے۔

پانچواں مسئلہ: ان کافروں نے ایسے بُرے کام کیے تھے، جو اکثر کافروں نے نہیں کیے تھے؛ مثلاً ان کا اپنے نبی صلی اللہ علیہ وسلم کو زخمی کرنا، ان کے قتل کی کوشش کرنا اور مسلمان شہدا کا مُثلہ کرنا وغیرہ، جب کہ وہ مسلمانوں کے رشتے ناطے ہی کے لوگ تھے۔

چھٹا مسئلہ: اللہ تعالیٰ نے اس بد سلوکی اور آپ صلی اللہ علیہ وسلم کی بد دعا کرنے پر یہ آیت نازل فرمائی: ﴿لَیْسَ لَکَ مِنَ الْاَمْرِ شَیْئٌ﴾ ﴿اے نبی! اس معاملے میں آپ صلی اللہ علیہ وسلم کو کچھ اختیار نہیں۔﴾۔

ساتواں مسئلہ: اللہ تعالیٰ کا اس فرمان: ﴿اَوْ یَتُوْبَ عَلَیْہِمْ اَوْ یُعَذِّبَہُمْ﴾ ﴿کہ اللہ تعالیٰ ان کفار کو معافی دے دے گا یا انہیں عذاب دے دے گا﴾ کے بارے میں یہ بات ملحوظ خاطر رہے کہ اللہ تعالیٰ نے انہیں معاف کر دیا اور وہ ایمان لے آئے۔

آٹھواں مسئلہ: حادثات کے وقت قنوتِ نازلہ پڑھنے کا ثبوت ملتا ہے۔

نواں مسئلہ: نماز کے دوران قنوتِ نازلہ میں کسی مخصوص شخص اور اس کے آبا واجداد کے نام بھی لیے جا سکتے ہیں۔

دسواں مسئلہ: قنوتِ نازلہ میں کسی معین شخص کا نام لے کر اس پر لعنت بھیجنا جائز ہے۔

گیارہواں مسئلہ: یہاں ان باتوں کا بھی ذکر ہے، جن کی اللہ کے رسول صلی اللہ علیہ وسلم نے اپنے خاندان کے ایک ایک آدمی کو بلا کر اس آیت کے نزول کے بعد یقین دہانی کرائی: ﴿وَاَنْذِرْ عَشِیْرَتَکَ الْاَقْرَبِیْنَ﴾ ﴿اور آپ اپنے قرابت داروں کو عذابِ الٰہی سے ڈرا دیں!﴾

بارہواں مسئلہ: آپ صلی اللہ علیہ وسلم نے توحید کی دعوت کی خاطر اس حد تک تگ ودو کی کہ آپ کو مجنوں تک کہا گیا اور یہی حال آج بھی ہوتا ہے، جب کوئی مسلمان اس کام کو انجام دیتا ہے۔

تیرہواں مسئلہ: آپ صلی اللہ علیہ وسلم نے اپنے قریبی اور دور کے، دونوں طرح کے قرابت داروں سے فرما دیا: «میں تمہیں اللہ کے عذاب سے بالکل بچا نہیں سکتا۔» یہاں تک کہ آپ صلی اللہ علیہ وسلم نے یہ بھی کہہ دیا: "اے فاطمہ بنتِ محمد! میں اللہ کے ہاں تمہارے بھی کسی کام نہیں آسکتا!"۔ جب آپ صلی اللہ علیہ وسلم سیدالمرسلین ہونے کے باوجود سارے جہان کی خواتین کی سردار سے فرمائیں کہ میں اللہ کے ہاں تمہارے کچھ کام نہیں آسکتا اور انسان کا اس بات پر ایمان بھی ہو کہ آپ صلی اللہ علیہ وسلم حق کے سوا کچھ نہیں کہتے، اور اس کے بعد وہ موجودہ حالات کا جائزہ لے اور خواص الناس کے دلوں میں واقع پذیر چیز کے بارے میں غور و فکر کرے، تو اس کے سامنے توحید خالص کا ترک اور دین کی اجنبیت عیاں ہو جاتی ہے۔